Iqtisodiyot va moliya

Bugungi kunda iqtisodiyotning raqamlashtirilishi, global bozorlarning jadal rivojlanishi, moliyaviy texnologiyalar (fintex)ning keng qo‘llanilishi hamda davlat boshqaruvi va moliyaviy nazorat tizimida samaradorlikni oshirish jarayonlari iqtisodiyot va moliya yo‘nalishida yuqori malakali mutaxassislarni tayyorlashni dolzarb vazifaga aylantirmoqda. Shu bois, zamonaviy iqtisodiy tahlil, moliyaviy boshqaruv, bank ishi, soliq tizimi, buxgalteriya hisoboti va raqamli iqtisodiyot sohalarida kompetensiyalarga ega bo‘lgan kadrlarni tayyorlashda “Iqtisodiyot va moliya” kafedrasining o‘rni beqiyosdir.

O‘zbekiston Respublikasida amalga oshirilayotgan iqtisodiy islohotlar, xususan iqtisodiyotni modernizatsiya qilish, moliyaviy boshqaruvni takomillashtirish va inson kapitalini rivojlantirishga qaratilgan davlat siyosati doirasida Andijon davlat universitetida iqtisodiyot sohasiga oid ta’lim yo‘nalishlari muntazam takomillashtirib borilmoqda. Ushbu jarayonlar asosida universitet rektori buyrug‘i bilan “Iqtisodiyot va moliya” kafedrasi tashkil etilgan

Kafedrada hozirda jami 18 nafar professor-o‘qituvchi faoliyat yuritmoqda. Ulardan 6 nafari dotsent, 7 nafari katta o‘qituvchi va 5 nafari assistent o‘qituvchilardir. 2025-yil 2-sentabrdan boshlab kafedra mudiri lavozimida iqtisodiyot fanlari bo‘yicha falsafa doktori, dotsent Ro‘zimov Bahromjon Baxodirjonovich faoliyat olib bormoqda.

Kafedra oldiga qo‘yilgan ustuvor vazifalar — iqtisodiyot va moliya yo‘nalishlarida yuqori malakali, raqobatbardosh mutaxassislar tayyorlash, ilmiy-tadqiqot ishlarini rivojlantirish hamda o‘quv jarayonini zamonaviy pedagogik va axborot texnologiyalariga asoslangan holda tashkil etishdir. Ta’lim jarayoni yetakchi xorijiy universitetlar o‘quv dasturlariga mos ravishda shakllantirilgan bo‘lib, quyidagi fanlar chuqur o‘rganiladi: mikroiqtisodiyot, makroiqtisodiyot, korporativ moliya, xalqaro iqtisodiy munosabatlar, investitsiyalarni boshqarish, soliq va budjet tizimi, bank ishi, buxgalteriya hisobi, iqtisodiy xavfsizlik, iqtisodiy modellashtirish va raqamli iqtisodiyot asoslari.

Talabalar iqtisodiy jarayonlarni tahlil qilish, moliyaviy ko‘rsatkichlarni baholash, investitsion loyihalarni shakllantirish, bank va moliya muassasalari faoliyatini o‘rganish, statistika hamda iqtisodiy modellar asosida qarorlar qabul qilish bo‘yicha amaliy ko‘nikmalarga ega bo‘lib borishadi. Kafedra professor-o‘qituvchilari Respublika ilmiy-amaliy konferensiyalari, xalqaro loyihalar va grantlarda faol ishtirok etib, iqtisodiyot va moliya sohalariga oid yangi ilmiy natijalarni ta’lim jarayoniga tatbiq etmoqda.

Kafedra jamoasi o‘z sohasida katta tajribaga ega mutaxassislardan iborat bo‘lib, ular nafaqat zamonaviy nazariy bilimlarni o‘rgatadi, balki talabalarning kasbiy va shaxsiy rivojlanishiga ham ko‘maklashadi. “Iqtisodiyot va moliya” kafedrasining ilmiy va amaliy ishlari Andijon viloyati va respublika iqtisodiy rivojlanishiga xizmat qiluvchi malakali kadrlar tayyorlashga qaratilgan.