Tasviriy va amaliy san’at

“Tasviriy va amaliy san’at” kafedrasi Andijon davlat universitetining Sport va madaniyat fakulteti tarkibida faoliyat yurituvchi, Tasviriy va amaliy san’at soxasida zamonaviy talablari asosida yuqori malakali ijodkor mutaxassislar tayyorlaydigan yetakchi ilmiy-ijodiy ta’lim bo‘linmalaridan biridir. Kafedra 2023-yilda tashkil etilgan bo‘lib, qisqa vaqt ichida o‘zining salohiyati, ilmiy-ijodiy jarayonlarda o‘ziga xos maktabiga ega bo‘lib, sohaga oid ta’lim dasturlari bilan fakultet hamda universitet taraqqiyotida muhim o‘rin egalladi.

Shuningdek, kafedra yosh avlodni xalq amaliy sanʼati anʼanalariga hurmat ruhida tarbiyalash, ularni zamonaviy sanʼat texnologiyalari bilan uyg‘un holda ijod qilishga yo‘naltirish, mustaqil fikrlovchi, ijodkor va raqobatbardosh kadrlar yetishtirishni muhim vazifa deb biladi. Taʼlim jarayonida sanʼatning tarixiy rivoji, milliy madaniyatimizning boy merosi va bugungi kun talablari uzviy bog‘liq holda o‘rgatiladi.

Kafedra tashkil topgan paytdan boshlab Tasviriy va amaliy san’at yo‘nalishlarda keng ko‘lamli ta’lim, metodik va ilmiy izlanishlar olib borilmoqda: Ixtisoslashtirilgan san’at maktablari, Musiqa va san’at maktablariga iqtidorli va ijodkor kadrlar yetkazib bermoqda. Kafedra tarkibidagi professor-o‘qituvchilarning ilmiy salohiyati yuqori bo‘lib, ulardan yetti nafari O‘zbekiston Badiiy Akademiyasinig “Badiiy ijodkorlar uyushmasi” a’zolari sanaladi. Ular san’atshunoslik, rangtasvir, amaliy san’at, haykaltaroshlik hamda miniatyura yo‘nalishlarida ijod qilib, nufuzli respublika va xalqaro ko‘rgazmalarda o‘z ijod namunalari bilan muntazam qatnashib kelmoqdalar. Jumladan, mazkur professor-o‘qituvchilar tomonidan: - Tasviriy va amaliy san’at dolzarb muammolari bo‘yicha ilmiy tadqiqotlar, monografiyalar, darslik va o‘quv qo‘llanmalar, OAK hamda xalqaro ilmiy jurnallarda maqolalar muntazam chop etilmoqda. Kafedra olimlari tomonidan shakllangan ilmiy-ijodiy yo‘nalishlarda o‘zining ilmiy natijalari bilan yetakchi o‘rin egallab bormoqda.