Andijon davlat universiteti Chet tillar fakultetida talabalar o‘rtasida "Yosh tarjimon" ko‘rik-tanlovi o‘tkazildi.

Tanlov joriy yilning 28-sentabridan 3-oktabr kuniga qadar davom etib, unda Xorijiy til va adabiyoti: ingliz tili yo‘nalishida tahsil oluvchi 70 dan ortiq talabalar ishtirok etdilar. Ko‘rik-tanlov ikki shartdan iborat bo‘lib, talabalar yozma va og‘zaki tarjima shartlarida o‘z bilimlarini sinovdan o‘tkazdilar. Og‘zaki tarjima ham o‘z navbatida ikki turda o‘tkazilib, talabalarning erkin va sinxron tarjima qilish ko‘nikmasi tekshirildi.

Tanlov yakunlariga ko‘ra barcha shartlarda tengdoshlaridan bilimliroq ekanini namoyon etgan Ingliz tili 206-guruh talabasi Bahodirjonova Xilola birinchi o‘rinni egalladi. Ikkinchi o‘ringa 106-guruh talabasi Alimova Madina va uchinchi o‘ringa 107-guruh talabasi Qobulov Jahongirlar sazovor bo‘ldilar.

Ko‘rik-tanlovning eng hayajonli damlari – talabalarni taqdirlash marosimi ingliz tili fonetikasi kafedrasida bo‘lib o‘tdi. Taqdirlash marosimida fakultet dekani A.Mamatqulov,  dekan o‘rinbosari X.Matqulov, ingliz tili kafedrasi mudiri S.Solijonov, kafedra o‘qituvchilari, tadbirni tashkil qilgan kafedra o‘qituvchisi J.Egamberdiev va ishtirokchi talabalar qatnashdilar.

Taqdirlash marosimi ko‘tarinki ruhda o‘tkazilib, unda so‘z olganlar tarjimadagi qiyinchiliklar va tarjimonlarning yutuqlari to‘g‘risida o‘z fikrlarini bildirib o‘tdilar. G‘oliblar fakultet rahbariyatining faxriy yorliq va esdalik sovg‘alari bilan taqdirlandilar. Fakultet rahbariyati tanlovni tashkil qilgan ingliz tili fonetikasi katta o‘qituvchisi Jasurbek Egamberdievga o‘z minnatdorchiligini bildirib o‘tdi.