Bugungi kunda faoliyat ko‘rsatib kelayotgan Andijon davlat universiteti akademik litseyi O‘zbekiston Respublikasi Oliy Ta’lim, Fan va Innovatsiyalar Vazirligi, O‘rta maxsus kasb-hunar ta’limi Markazining 2004-yil 24-avgustdagi 178-son buyrug‘i asosida tashkil etilgan va unga Andijon davlat universiteti qoshidagi akademik litsey nomi berilgan. Yangi tashkil etilgan akademik litseyning direktori etib matematika fanlari doktori, professor Sherali Mirzakarimovich Qosimov tayinlandi. 2004-2005-o‘quv yilida akademik litsey “Aniq fanlar”, “Tabiiy fanlar”, “Xorijiy tillar” hamda “Ijtimoiy-gumanitar fanlar” yo‘nalishlariga 266 nafar o‘quvchini qabul qilib, o‘z faoliyatini boshlagan edi.
O‘tgan davr mobaynida akademik litseyning pedagog-o‘qituvchilari va o‘quvchilari safi kengayib bordi. Bundan tashqari o‘quv jarayonini tashkil etishda akademik litseyning moddiy texnik bazasi ham boyitib borildi. O‘quvchilar uchun qulay sharoitlar yartish maqsadida 250 o‘rinli talabalar yotoqxonasi faoliyati yo‘lga qo‘yildi.
Akademik litseyga 2004-2010-yillarda Sh.M.Qosimov, 2011-2016-yillarda S.X.Sobirov, 2016-2021-yillarda D.E.Abidovalar rahbarlik qilib keldilar.
Akademik litsey o‘qituvchilar va o‘quvchilari qator yutuqlarga erishib kelganligi quvonarli hol, albatta. Xususan, 2014-yilda Xorijiy tillar yo‘nalishi 3-bosqich 29-guruh o‘quvchisi Abdullayeva Go‘zaloy mamlakatimizda yoshlarni, xususan, yosh qizlarni qo‘llab-quvvatlash maqsadida tashkil etilgan “Zulfiya” nomidagi Davlat mukofotiga sazovor bo‘ldi. 2021-yilda esa Aniq fanlar kafedrasi matematika fani o‘qituvchisi Xojiyev Dilmurod uzoq yillik samarali mehnatlari inobatga olinib hukumatimiz tomonidan “Shuhrat” medali bilan taqdirlandi. Bundan tashqari har yili akademik litsey o‘quvchilari viloyatimiz va respublikada tashkil etiladigan matematika, fizika, kimyo, biologiya, ona tili va adabiyot, rus tili, ingliz tili, tarix fan olimpiadalarida ham muvaffaqiyatli qatnashib, nufuzli o‘rinlarni egallab kelmoqdalar.
O‘zbekiston Respublikasi Prezidentining 2020-yil 3-dekabrdagi “Iqtidorli yoshlarni saralab olish tizimi va akademik litseylar faoliyatini takomillashtirish chora-tadbirlari to‘g‘risida”gi 4910- sonli qarori akademik litseylar faoliyaiti tubdan o‘zgartirdi. Unga ko‘ra tegishli akademik litseylari bor universitetlarning o‘quv ishlari bo‘yicha prorektori bir vaqtning o‘zida akademik litsey direktori ham hisoblanadigan bo‘ldi.
Bugungi kunda Andijon davlat universiteti akademik litseyiga Valiyev Ulug‘bek Qodirjonovich rahbarlik qilib kelmoqda. Akademik litsey o‘quv ishlari bo‘yicha direktor o‘rinbosari vazifasida Mo‘ydinov Lazizbek Azizbek o‘g‘li, yoshlar bilan ishlash bo‘yicha direktor o‘rinbosari vazifasida Akbarov Bunyodbek Ikromovichlar ishlab kelmoqda. Shuningdek, akademik litseyda ta’lim yo‘nalishlari bo‘yicha to‘rtta kafedra faoliyat yuritadi. Bular “Aniq fanlar”, “Xorijiy tillar”, “O‘zbek filologiyasi” va “Ijtimoiy-gumanitar fanlar” kafedralari bo‘lib, ularda jami 50 nafar pedagog-xodimlar yosh avlodga saboq berib kelmoqda. Hozirgi kunda akademik litsey faoliyati tubdan isloh qilingan holda o‘quvchilarga zamonaviy o‘qitish vositalari bilan jihozlangan o‘quv xonalarida dars mashg‘ulotlari olib borilmoqda. Darsdan tashqari vaqtlarda o‘quvchilarning bo‘sh vaqtlarini samarali o‘tkazishlari uchun barcha fanlardan fan to‘garaklari, shaxmat-shashka, tikuvchilik, to‘quvchilik, musiqa to‘garaklari ham tashkil etilgan bo‘lib, bularning barchasi tizimli yo‘lga qo‘yilgan.
