"Haqiqatan ham, biz, ota-onalar, ustoz va murabbiylar sizlarni, butun O‘zbekiston yoshlarini Vatanimiz, jamiyatimizning hal qiluvchi kuchi deb bilamiz va sizlar hamisha xalqimizning mana shunday yuksak ishonchiga munosib bo‘lasiz, deb ishonamiz”.

O‘zbekiston Respublikasi Prezidenti Shavkat Mirziyoev

O‘zbekiston Respublikasi Prezidenti 2017 yil 30 iyun sanasida bo‘lib o‘tgan “Kamolot” YoIHning VI qurultoyida aynan 30 iyun sanasini mamlakatimizda “Yoshlar kuni” deb e’lon qilish xaqidagi taklifni bildirganlar. Bu yil ushbu bayram ilk marotaba butun mamlakatimiz bo‘ylab keng va ko‘tarinkilik ruhida nishonlanmoqda.

Davlatimiz rahbarining yoshlar qalbidagi, yuragidagi o‘y-fikrlari, maqsad-muddaolari, kerak bo‘lsa, ushalmay turgan niyatlari bilan yaqindan tanishishni o‘z faoliyati uchun muhim deb ta’kidlashlari O‘zbekiston yoshlari uchun ulkan e’tiborning yorqin timsolidir.

Andijon davlat universitetida ham ushbu kunga tayyorgarlik ishlari yuqori darajada tashkil etilmoqdi. Joriy yilning 27 iyun kuni universitet boshlang‘ich xotin-qizlar qo‘mitasining tashabbusi bilan 4-sonli talabalar turar joyining yozgi amfiteatrida 30 iyun - “Yoshlar kuni” ga bag‘ishlangan madaniy-ko‘ngilochar bayram kechasi o‘tkazildi. Tadbirda boshlang‘ich xotin-qizlar qo‘mitasi qoshidagi “Qizlarjon” klubi a’zolari ishtirokida sho‘x raqs va qo‘shiqlar ijro etildi. Toshkent Agrar universiteti Andijon filialining iste’dodli talabalaridan tashkil topgan “Quvnoqlar va zukkolar” respublika ko‘rik-tanlovi g‘oliblari - “Og‘alar” jamoasi chiqishlari hammaga ko‘tarinki xush kayfiyat bag‘ishladi.

Tadbir so‘nggida ma’naviy va ma’rifiy ishlar bo‘yicha prorektor A’zamjon Hamraqulov, boshlang‘ich xotin-qizlar qo‘mitasi raisi Umidaxon Ahmedova tomonidan “Og‘alar” jamoasi a’zolariga hamda iqtidorli va faol talabalarga esdalik sovg‘alari topshirildi.