Yoshlarning oliy ta'lim muassasalariga bo‘lgan qiziqishlarini oshirish, ularni kelajakdagi kasbiy yo‘nalishlari haqida to‘liqroq ma'lumot bilan tanishtirish maqsadida yo'naltirilgan "Ochiq eshiklar kuni" munosabati bilan, bugun, 18-yanvar kuni Jalaquduq tumanida joylashgan 25-umumta'lim maktabi bitiruvchilari Andijon davlat universitetida bo'ldi.

Universitetning mas'ul xodimlari o‘quvchilarga universitetning o‘quv jarayoni va o'quv binolari, zamonaviy laboratoriyalar, fakultetlar va o'quv yo'nalishlariga munosib tarzda jihozlangan auditoriyalar haqida ma'lumotlar berib, bitiruvchilar uchun universitetda tashkil etilgan ilmiy laboratoriyalar, innovatsion dasturlar va o‘quv jarayonida qo‘llaniladigan zamonaviy texnologiyalarni ko‘rish imkoniyati yaratildi.

Bunday uchrashuvlar nafaqat o‘quvchilarning oliy ta'limga bo‘lgan qiziqishini yanada oshiradi, balki ular uchun kelajakda qanday kasb egasi bo‘lishini tanlashda muhim yo‘l-yo‘riq bo'lib, o‘quvchilarga o‘z orzu-istaklari va iqtidorlarini amalga oshirish uchun qanday imkoniyatlar mavjudligini ko‘rsatadi.

Andijon davlat universiteti, o‘zining ilmiy va moddiy-texnik bazasi bilan yoshlarning ta'lim olish va kelajakdagi kasbiy faoliyatini boshlash uchun eng qulay muhitni taqdim etadi.