Andijon davlat universiteti “O'zbek tilshunosligi” kafedrasi professori v.b., filologiya fanlari doktori Ma'murjon Saidxonov Turkiyaning Istanbul shahrida joylashgan Yildiz Texnika Universiteti hamda IKSAD tomonidan tashkil etilgan xalqaro loyihada ishtirok etmoqda.

Ushbu loyiha “Turk dunyosi o‘qituvchi-pedagoglarining o‘zaro tajriba almashinuvi va integratsiyalash loyihasi – TDEEABP, 2021-2025” doirasida amalga oshirilmoqda.

M.Saidxonov Yildiz Texnika Universiteti Pedagogika fakultetining taklifiga asosan tashkil etilgan “Turk dunyosi o‘qituvchilarining tajriba almashish va malaka oshirish o‘quv kurslari” doirasidagi “Oliy ta’lim muassasalarida o‘qitish amaliyotini va o‘quv jarayonini tashkil etishning pedagogik strategiyasini takomillashtirish” mavzusidagi malaka oshirish o‘quv kurslarida ishtirok etmoqda. Ushbu kurs davomida ular o‘z sohalarida xalqaro tajriba va ilg‘or pedagogik yondashuvlarni joriy qilish imkoniyatiga ega bo‘ladilar.

Shuningdek, universitetimiz professori Yildiz Texnika universitetida 18 soatlik ma’ruza o‘qib, o‘zbek va turk ta’lim tizimlari o‘rtasidagi o‘zaro aloqalarni yanada mustahkamlashga xizmat qiluvchi dolzarb mavzularni yoritib berdi.

O‘zbekistonlik professor-o‘qituvchilar Turkiyaning Anqara shahrida 11-12-yanvar kunlari bo‘lib o‘tgan xalqaro kongressda ham ishtirok etib, o‘z ilmiy tajribalari bilan bo‘lishdilar va ta’lim tizimini takomillashtirishga oid fikr-mulohazalarini ilgari surdilar.

Mazkur xalqaro loyiha va tadbirlar nafaqat pedagogik tajriba almashinuvi, balki o‘zbek ta’lim tizimining xalqaro maydondagi nufuzini oshirish, ilmiy hamkorlikni rivojlantirish va ilg‘or texnologiyalarni amaliyotga joriy etish yo‘lida muhim qadam bo‘lib xizmat qiladi.