Ayni kunlarda Andijon davlat universiteti rektori, texnika fanlari doktori, dotsent Baxtiyorjon Akbaraliyev Qirg‘iz Respublikasining Bishkek shahrida bo‘lib o‘tayotgan “Global chaqiriqlar kontekstida Markaziy Osiyo universitetlarining transformatsiyasi” mavzusidagi Qoraqirg‘iz avtonom viloyati hamda Qirg‘iziston Respublikasi ta’lim institutining 100 yilligiga bag‘ishlangan Markaziy Osiyo universitetlari rektorlari forumida ishtirok etmoqda.

Markaziy Osiyoning 100 dan ortiq yetakchi oliy ta’lim muassasalari rahbarlari ishtirok etayotgan mazkur xalqaro forumning maqsadi mintaqada fan va ta’lim sohasidagi xalqaro hamkorlikka oid dolzarb masalalarni muhokama qilish, oliy ta’limni o‘zgartirishning strategik masalalari yuzasidan fikr almashish, universitetlararo hamkorlik shartnomalarini imzolash va qo‘shni mamlakatlar oliy o‘quv yurtlari o‘rtasidagi konstruktiv aloqalarni mustahkamlash uchun unikal platforma yaratishdan iborat.

Faxriy mehmon sifatida taklif etilgan Andijon davlat universiteti rektori ushbu forumda “Globallashuv sharoitida O‘zbekiston va Qirg‘iziston universitetlari uchun imkoniyatlar va muammolar” mavzusidagi ma’ruzasi bilan ishtirok etib, tashrif doirasida Qozog‘iston, Qirg‘iziston, Tojikiston hamda Turkmaniston oliy ta’lim muassasalari rektorlari bilan uchrashdi.