Kuni kecha Belorussiyaning Polotsk davlat universiteti Gumanitar fanlar fakulteti dekani Aleksey Leonidovich Radyuk hamda texnologiya va o’qitish metodikasi kafedrasi mudiri Natalya Viktorovna Dovgyalolar universitetda hamkorlikda amalga oshirilayotgan qo’shma ta’lim dasturlari bo’yicha fikr almashish, ikki tomonlama hamkorlikni rivojlantirishga qaratilgan chora-tadbirlar rejasini muhokama qilish maqsadida Andijon davlat universitetiga tashrif buyurdilar.

Universitet rahbariyati, fakultet dekanlari bilan o’tkazilgan uchrashuv davomida Andijon davlat universiteti Polotsk davlat universiteti bilan hamkorlikda qo’shma ta’lim dasturlarini tashkil etgan ilk universitetlardan biri ekanligi va ushbu hamkorlik natijasida 2023-yilda “Texnologik ta’lim” yo’nalishi bo’yicha taxsil olgan va muvaffaqiyatli yakunlagan bitiruvchi talabalarga davlat na’munasidagi diplomlar taqdim etilgan bo’lsa, joriy yilda esa ikki ta’lim yo’nalishlari talabalarini bitirishi kutilayotganligi ta’kidlandi.

2023-2025-yillarga mo’ljallangan “Yo’l xaritasi”da “Axborot texnologiyalari” va “Psixologiya” ta’lim yo’nalishlari professor-o’qituvchilari almashinuvini amalga oshirish hamda kelgusida qo’shma ta’lim dasturlarini tashkil etish vazifalari belgilanganligini inobatga olgan holda muzokaralar davomida ushbu vazifalar yuzasidan amaliy ishlar rejalashtirildi.

Uchrashuv yakunida Andijon davlat universiteti rektori Akramjon Sultanmuradovichga  universitetlar o’rtasidagi hamkorlikni rivojlantirishga qo’shayotgan hissasi uchun “Efrosiniya Polotskaya nomidagi Polotsk davlat universiteti Faxriy Professori” unvoni berildi.