Mavsumiy o‘quv-dala amaliyoti o‘quv jarayonining tarkibiy qismi hisoblanib, mavsum bilan bog‘liq hayvonlar va o‘simliklar turlarini o‘rganish asosida nazariy bilimlarni mustahkamlash imkonini beradi.

2-kurs biologiya yo‘nalishi talabalari Ulug‘nor baliqchilik xo‘jaligida bo‘lishib, juda zo‘r taassurotlar bilan qaytishdi.

Dala amaliyotining talabalaridan kelib chiqib:

1. Texnik xavfsizlik qoidalari (yakka o‘zi yurmaslik, suvga tushmaslik, qayiqlarga chiqmaslik, o‘lgan hayvonlarni ushlamaslik ... kabilar);
2. Ekskursiyaning yo‘nalishi, asosiy vazifalar, nimalarga e’tibor berish kerakligi tushuntirildi.

Talabalar inkubatsiya sexida sazan, oq amur, do‘ng peshona baliq, ilon bosh, yangi introduksiya qilingan Afrika laqqasini ko‘paytirish texnologiyasi bilan tanishdilar.

Baliqlarni tuxum-lichinkadan boshlab, o‘stirish hovuzlariga, undan 4-5 gektarli mahsuldor hovuzlarga o‘tkazilish jarayonini ko‘rishdi. Hovuzlarda parvarish qilinayotgan sazan, oyna karp, ilonbosh, oq amur, xumbosh galalarini kuzatishdi va ovqat ratsionini o‘rganishdi.

Mahsuldor xovuzlar atrofidagi turong‘i, jiyda, tobulg‘i, qandim, suvda o‘sayotgan qamish, qo‘g‘a, suv o‘tlar bilan yaqindan tanishdilar.

Ornitofaunaga tegishli laylak, yovvoyi o‘rdak, suqsun o‘rdagi, churrak loyxo‘rak, chayka, bizg‘ildoq, hakka, so‘fito‘rg‘ay, mayna, kurkanak, miqqiy, sor, sutemizuvchilardan quloqdor tipratikan, ondatrani tabiiy holda ko‘rib kuzatishdi.

Qum uyumlari biotsenozi o‘ziga xosligi bilan ajralib turishini: saksovul, qandim, qumtarik, sigirquyruq o‘sayotgan joylarni o‘rganishdi.