Andijon davlat universitetida o‘zining g‘oyat samimiy, xalqona misralari bilan har bir o‘zbekning qalbidan keng joy olgan  betakror ijodkor, O‘zbekiston xalq shoiri Muhammad Yusuf tavalludining 64 yilligiga bag‘ishlangan ma’naviy, ma’rifiy va madaniy tadbir o‘tkazildi.

Tadbirda Toshkentdan, qo‘shni viloyatlardan bir guruh mexmonlar – shoira  Umida Abduazimova, shoira Dilbar Haydarova, shoira Zuxra Alieva, Muhammad Yusufning rafiqasi, jurnalist Nazira As-Salom, O‘zbekiston Milliy universiteti dotsenti, filologiya fanlari nomzodi Norqul Bekmirzaev, O‘zbekiston yozuvchilar uyushmasi Andijon viloyati rahbari shoira Xurshidabonular tashrif buyurdi. Shuning bilan birga tadbirda universitetning ma’naviy-ma’rifiy ishlar bo‘yicha prorektori A.Sh.Hamraqulov, ilmiy ishlar bo‘yicha prorektor B.M.Rasulov, MATB boshlig‘i A.J.Akbarov, ma’naviy-ma’rifiy ishlar bo‘yicha dekan o‘rinbosarlari va 325 nafar universitetning professor-o‘qituvchilari hamda talabalari ishtirok etdi.

Tadbirda universitetning ilmiy ishlar bo‘yicha prorektori B.M.Rasulov, O‘zbekiston Milliy universiteti dotsenti Norqul Bekmirzaevlar so‘zga chiqib, shoir ijodining o‘ziga xos qirralari, mazmun –mohiyati va badiyati haqida alohida to‘xtalib o‘tdilar. Shundan so‘ng Muhammad Yusuf haqidagi yorqin xotiralari bilan o‘rtoqlashish uchun birin-ketin ijod ahli – shoira Umida Abduazimova, shoira Dilbar Haydarova, shoira Zuxra Alievalar minbarga ko‘tarilib, shoir hayotlik chog‘larida birga kechgan ijodiy hamkorlik jarayonlari, talabalik yillaridagi qiziqarli taassurotlar haqida to‘lqinlanib so‘zladilar. Tadbirning eng kulminatsion cho‘qqisi Muhammad Yusufning rafiqasi Nazira As-Salomning shoir haqidagi unutilmas xotiralari va birga yashagan davrlaridagi masrur onlari, farzandlariga qanchalik mehribon bo‘lganligi, o‘zining esdaliklarini to‘lqinlanib, g‘ururlanib eslagani bo‘ldi. So‘zga chiqqan shoiralarning barchasi Muhammad Yusuf xotirasiga bag‘ishlab yangi yozgshan she’rlarini o‘qib berdilar.

Universitetning iqtidorli talabalari tomonidan shoir qalamiga mansub she’rlar asosida kuylangan qo‘shiqlar ijro etilib, she’rlaridan na’munalar o‘qidilar. Shuningdek tadbirga tashrif buyurgan Asaka tumanidagi 16-maktabning 3-sinf o‘quvchisi, eng kichik ishtirokchisi Zaynobidinova Mohlaroyning yoddan o‘qigan she’ri barchani to‘lqinlantirib yubordi.

Tadbir barchada katta taassurot qoldirdi.