Bugun, 12-aprel kuni Andijon davlat universitetiga Ozarbayjon davlatidan adabiyotshunos olim, professor Ramiz Askarov tashrif buyurdi.

Tashrif buyurgan mehmon universitet rektori, professor Akramjon Yuldashev tomonidan munosib kutib olindi va universitetning kichik majlislar zalida filologiya fakulteti professor-o‘qituvchilari hamda talabalar ishtirokida uchrashuv tashkil etildi.

Uchrashuv avvalida rektor Akramjon Yuldashev so‘z olib, bugungi o‘zbek adabiyotining buyuk tarixi, ulug‘ ajdodlarimizning o‘zbek adabiyotiga qo‘shgan ulkan hissasi haqida gapirib o‘tdi.

So‘ng uchrashuv mehmoni, professor Ramiz Askarov Navoiyning boqiy merosi, Bobur asarlari, ularning o‘rganilish tarixi haqida fikr bildirib o‘tdi. Shuningdek, o‘zining Navoiy asarlarini o‘rganish borasidagi ilmiy ishlari, noyob asarlari, Navoiy asarlari tarjimasi, ilmiy ishlari borasida erishgan yutuqlari haqida ma'lumot berib, universitetimiz kutubxonasiga o'zining ijodidagi ko‘plab kitoblarni hadya etdi.

Uchrashuv davomida adabiy mulohazalar bildirildi, professor-o‘qituvchilar o‘rtasida o‘zaro fikrlar almashdilar. Uchrashuvda ishtirok etgan talabalar adabiyotshunos olim Ramiz Askarov haqida o'zlari uchun muhim bo'lgan ma'lumotlarga ega bo'ldilar.

Uchrashuv so‘nggida rektor tomonidan Ramiz Askarovga "Andijon davlat universiteti Faxriy professori" unvoni tantanali topshirildi.