Universitetimiz talabalari orasida tashkilotchi, ilgʻorlarini aniqlash, yoshlarning tashabbuslarini qoʻllab-quvvatlash, oʻzaro fikr almashish va Yoshlar Ittifoqi imtiyozlari va qulayliklari bilan tanishtirish maqsadida tashkil etilayotgan "Yoshlar soati" bugun Filologiya fakultetida boʻlib oʻtdi.

Andijon davlat universiteti Yoshlar Ittifoqi yetakchisi O. Olimjonov boshchiligidagi fakultet yetakchilaridan iborat targʻibot guruhi bilan boʻlib oʻtgan uchrashuvni Filologiya fakulteti yoshlar bilan ishlash boʻyicha dekan oʻrinbosari A. Ergashev ochib berdi. Har bir fakultet yetakchilari oʻzlari erishgan yutuqlari, Ittifoq doirasida tashkil etilgan tanlovlar va kelgusidagi rejalar haqida soʻz yuritdilar. Xususan, tabiiy fanlar fakulteti yetakchisi Muhiddin Noʻmonjonov talabalarni dorivor oʻsimliklar bilan shugʻullanuvchi jamoaga, jismoniy madaniyat fakulteti yetakchisi sportning turli yoʻnalishlari boʻyicha toʻgaraklarga taklif qildilar.

Chet tillari fakulteti yetakchisi Odilova Gulchiroy oʻz soʻzini maxsus psixologik mashgʻulot bilan boshlab, yutuqlariga erishish yoʻlida qilgan harakatlari haqida talabalarga maʼlumot berdi. Uchrashuv davomida maktabgacha taʼlim fakulteti bilan applikatsiyalar yasash , chet tillari fakulteti bilan ingliz tili, sanʼatshunoslik fakulteti bilan fortepiano va gitara darslari oʻtkazilishiga kelishib olindi. Fakultet yetakchisi Naimaxon Toʻxtasinova talabalar nomidan minnatdorchilik bildirib, oʻzaro hamkorlikka tayyor ekanligini bildirdi.