Hukumatning 2017-yil 20-iyundagi 393-son ‘‘Oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risida’’gi nizomga muvofiq kechki (smenali) ta’limga talabalarni qabul qilinadi.

Kechki ta’limda o‘qish muddati kamida 4,5 yil davom etadi. Ushbu shaklda o‘qiydigan talabalarga kunduzgi ta’limda tahsil olayotgan talabalarga berilganidek talabalik guvohnomasi va reyting daftarchasi bepul beriladi.

Kechki ta’lim shaklida tahsil oladiganlar uchun davlat granti berilmaydi va ular grant taqsimotida ham ishtirok eta olmaydi. Ya’ni, talabalar faqat to’lov-kontrakt asosida o’qishga qabul qilinadi.

Kechki ta’lim shaklida ham o‘quv jarayoni ta’lim sohalarining davlat ta’lim standartlari va tegishli ta’lim yo‘nalishlari malaka talablari asosida tayyorlangan hamda O‘zbekiston Respublikasi Oliy va o‘rta maxsus ta’lim vazirligi tomonidan kunduzgi ta’lim uchun tasdiqlangan o‘quv rejasi va fan dasturlari asosida tashkil etiladi.

Shuningdek, kechki (smenali) ta’limning bir ta’lim sohasidan ikkinchisiga ko‘chirishga ruxsat berilmaydi.

O‘quv jarayoni bir o‘quv yilida ikki semestrli bo‘lib, o‘quv mashg‘ulotlarini o‘tkazish kunduzgi ta’lim bilan bir xil tartibda tashkil etiladi.

Ammo, kechki ta’limda o‘qish (kunduzgi ta’limdan farqli ravishda) bir haftada, odatda, 5 kun amalga oshiriladi va haftalik o‘quv soati hajmi 20 akademik soat qilib belgilanadi.