Bugun, 8-iyul kuni Andijon davlat universiteti rektori Baxtiyorjon Akbaraliyev yoshlarning bandligini ta’minlash, ularni har tomonlama qo‘llab-quvvatlash hamda o‘ziga biriktirilgan yoshlarga tizimli tarzda ko‘maklashish maqsadida Baliqchi tumanidagi “Fayziobod” mahalla fuqarolar yig‘inida istiqomat qilayotgan ishsiz yoshlar bilan uchrashdi.

Uchrashuv davomida yoshlarning hayotiy pozitsiyasi, kasbga bo‘lgan qiziqishlari, ma’lumot darajasi va imkoniyatlari o‘rganildi. Tahlil jarayonida aksariyat yoshlarning norasmiy ish faoliyati bilan bandligi aniqlanib, ularni rasmiy bandlik tizimiga jalb qilish masalalari muhokama qilindi.

Yoshlarga mavjud bo‘sh ish o‘rinlari, kasb-hunar o‘quv kurslari, imtiyozli kreditlar asosida tadbirkorlikni boshlash imkoniyatlari hamda davlat tomonidan qo‘llab-quvvatlash mexanizmlari haqida batafsil ma’lumotlar berildi. Shuningdek, ularning har biri bilan individual suhbatlar o‘tkazilib, aniq yo‘nalishlar bo‘yicha tavsiyalar berildi.