"Ma’rifat ulashib" loyihasi doirasida yozuvchi va shoirlar maktab o‘quvchilari bilan uchrashdi

Bugun, 20-dekabr kuni Andijon shahridagi 7-umumta'lim maktabida "Ma’rifat ulashib" loyihasi doirasida O‘zbekiston Yozuvchilar uyushmasi a’zolari, shoir, jurnalist Qo‘chqor Norqobil hamda Xosiyat Rustamovalar maktabning iqtidorli va iste’dodli o‘quvchilari bilan ochiq muloqot o‘tkazdi.

Ijodiy tadbirda qahramonlarimiz o‘quvchi-yoshlarni o‘zining ijod namunalari bilan tanishtirib, o‘z hayot yo‘llaridan misollar keltirgan holda yoshlarimizni ilmi-ma’rifatli va ona Vatanimizga muhabbatli insonlar bo‘lishga chorlab, zamonaviy o‘zbek adabiyoti, yosh ijodkorlar haqida iliq fikrlarini bildirishdi.

Samimiy va mulohazalarga boy o‘tgan suhbatlar she’rxonlik va mushoiraga ulanib ketdi. Yoshlar taniqli shoirlarning she’rlaridan bir olam zavq va ma’naviy ozuqa oldi. Tadbirda o‘qituvchilar tashrif uchun qalamkashlarga minnatdorlik hamda mana shunday ijodiy-ma’rifiy uchrashuvlarni ko‘proq o‘tkazish taklifini bildirdi.