Xabaringiz bor, joriy yilning 14–16-noyabr kunlari poytaxtimiz Toshkentda Oliy ta’lim, fan va innovatsiyalar vazirligi huzuridagi Innovatsion rivojlanish agentligi tomonidan “Barqaror rivojlanish uchun innovatsiyalar” mavzusiga bag‘ishlangan xalqaro innovatsion g‘oyalar haftaligi bo‘lib o‘tdi.

Haftalik doirasida 80 nafardan ortiq kompaniyalar, eronlik va o‘zbekistonlik tadbirkorlar, ilm-fan vakillari, davlat boshqaruv organlari, hokimliklar qatorida Andijon davlat universiteti professori Mo‘ydinjon Mo‘minov boshchiligida universitetimiz jamoasi yangi turdagi energotejamkor, samarador, zamonaviy qurilish materiallari yaratish texnologiyasi; meva, sabzavotlarni qayta ishlash texnologik qurilmalarini yaratish va unda yangi turdagi oziq-ovqat mahsulotlari olish kabi ishlanmalar bilan faol ishtirok etdi.

InnoWeek-2024 xalqaro innovatsion g‘oyalar haftaligi doirasida “Innovatsion g‘oyalar yetakchisi” tanlovi g‘oliblarini taqdirlash marosimida "Eng yangilikka intiluvchi universitet" nominatsiyasiga Andijon davlat universiteti loyiq deb topildi va Oliy ta’lim, fan va innovatsiyalar vaziri Q.Sharipov tomonidan professor M.Mo‘minov maxsus statuetka bilan taqdirlandi.
Ushbu xushxabar bilan universitetimiz jamoasini samimiy qutlaymiz!