O‘tmish va tarix-bu ikki so‘z o‘zining qamroviga juda katta ma’nolarni mujassam etgan. O‘tmish va tarixsiz kelajakni barpo etish, kelajakka intilish mushkul ekanligini barcha birdek anglaydi va biladi. O‘tmish va tarixni yodga olib, u bilan har doim suhbatlashsak, ularning nasihatiga quloq tutsak, kelajakda maqsad qilgan yuqori marralarni zabt etish ham oson kechadi.

Bugun, 13-noyabr kuni Andijon davlat universitetida 1974-1978-yillarda tarix yo‘nalishida tahsil olgan, uzoq yillar davomida samarali mehnat qilgan soha fidoyilari oliygohimizning sobiq talabalari ishtirokida "Yarim asrni ortda qoldirib, 70 yoshni qarshilayotgan ustozlar ibrati" mavzusida "Uch avlod" uchrashuvi o‘tkazildi.

Tadbir avvalida, Axborot texnologiyalari bo‘yicha prorektor Madaminjon Mahkamov so‘zga chiqib, ma’naviy-ma’rifiy tadbiridan ko‘zlangan maqsad tarixdan to‘g‘ri saboq chiqargan holda buyuk kelajakka ildam qadam tashlash, shu bilan birgalikda, ustoz-shogird an’analarini yanada rivojlantirish ekanligini ta’kidlab, tantanali tadbirni ochib berdi.

Uchrashuvda yoshi ulug‘ otaxon va onaxonlarimiz hayoti va mehnat faoliyati davomida to‘plagan boy tajribasi, yoshlik davridagi o‘ziga xos qiyinchiliklar, mehnat pallasidagi mashaqqatlar, nihoyat nuroniylik paytida ko‘rsatilayotgan hurmat-ehtirom haqida dil so‘zlarini, samimiy fikrlarini bildirdi.

Sermazmun suhbatlarga boy bo‘lgan ushbu ma’naviy-ma’rifiy tadbir ishtirokchilarning xotirasidan o‘chmas joy olishi bilan birgalikda, ularning kelgusi hayot yo‘llarini yorituvchi ziyo bo‘lib xizmat qilishi, shubhasiz.