Bugun, 8-iyun kuni Andijon davlat universitetida O'zbekiston xotin-qizlar "Olima" uyushmasi hamda Andijon viloyati "Oila va xotin-qizlar boshqarmasi" hamkorligida ''Fan, ta'lim va tarbiya jarayonida olima ayollarning o'rni'' mavzusida ilmiy seminar bo'lib o'tdi.

Unda Andijon viloyati “Oila va xotin-qizlar boshqarmasi” boshligʻi Gulnora Axmedova, Oʻzbekiston xotin-qizlar “Olima” uyushmasi raisi Raxbar Murtazayeva, Andijon davlat universiteti, Fuqarolik jamiyati nazariyasi kafedra mudiri Manzuraxon Yunusova hamda viloyatdagi davlat oliy ta'lim muassasalarida faoliyat yuritayotgan ayol professor-o'qituvchi va doktorantlar ishtirok etdi.

Seminarda ma'ruzachilar tomonidan xotin-qizlarning ijtimoiy-siyosiy faolligini oshirishda oqila va olima ayollarning roli, Oʻzbekiston yosh olimalarining ilm-fanga qoʻshayotgan hissasi, oliy taʼlim tizimida xotin-qizlarning ijtimoiy-siyosiy faolligini oshirish mavzularida ma'ruzalari tinglandi va viloyat xotin-qizlar ''Olima'' uyushmasining faoliyati, ish rejalari tahlil qilindi.

Uchrashuv davomida xotin-qizlarning ijtimoiy-siyosiy faolligini oshirishda oqila va olima ayollarning oʻrnini mustahkamlashga qaratilgan tavsiyalar ishlab chiqildi hamda ularni amalga oshirish uchun vazifalar belgilab olindi.