Yoshlarning oliy ta’lim bilan qamrab olinishini yanada kengaytirish, oliy ta’lim muassasalari o‘rtasida sog‘lom raqobatni kuchaytirish, karantin sharoitida oliy ta’lim muassasalariga abituriyentlarning hujjatlarini qabul qilish va kirish imtihonlarini talab darajasida tashkil etish, shuningdek, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarni amalga oshirish maqsadida:

1. Shunday tartib o‘rnatilsinki, unga muvofiq 2021/2022 o‘quv yili qabulidan boshlab davlat granti asosida kadrlarni tayyorlash bo‘yicha davlat buyurtmasi O‘zbekiston Respublikasida faoliyat yuritayotgan xorijiy oliy ta’lim tashkilotlari va ularning filiallari (keyingi o‘rinlarda – filiallar) hamda nodavlat oliy ta’lim tashkilotlari uchun ham shakllantiriladi. Bunda:

filiallar va nodavlat oliy ta’lim tashkilotlarida davlat granti asosida kadrlarni tayyorlash bo‘yicha davlat buyurtmasi vazirlik, idoralar va mahalliy davlat hokimiyati organlarining (keyingi o‘rinlarda – kadrlar buyurtmachilari) oliy ma’lumotli kadrlarga bo‘lgan ehtiyojidan kelib chiqib shakllantiriladi;

filiallar va nodavlat oliy ta’lim tashkilotlariga kirish imtihonlarida eng yuqori ball to‘plagan va o‘qishni tamomlagandan so‘ng kadrlar buyurtmachisi tizimida 5 yildan kam bo‘lmagan muddat davomida ishlab berish istagini bildirgan abituriyentlar bilan uch tomonlama (kadrlar buyurtmachisi–talaba–oliy ta’lim tashkiloti) shartnoma tuziladi;

filiallar va nodavlat oliy ta’lim tashkilotiga kirish imtihonlarida eng yuqori ball to‘plagan abituriyentlar kadrlar buyurtmachisi bilan shartnoma imzolash istagini bildirmagan taqdirda, shartnoma tuzish huquqi kirish imtihonlarida to‘plagan ballar ketma-ketligiga mos ravishda keyingi o‘rindagi abituriyentga beriladi;

davlat buyurtmasi asosida o‘qishga qabul qilingan talabalarning o‘qitish xarajatlari kadrlar buyurtmachilari tomonidan Davlat byudjeti parametrlarida mazkur maqsadlar uchun nazarda tutilgan mablag‘lar hisobidan qoplanadi.

Iqtisodiy taraqqiyot va kambag‘allikni qisqartirish vazirligi (Norkulov) Oliy va o‘rta maxsus ta’lim vazirligi (Toshkulov), Moliya vazirligi (Ishmetov) va Adliya vazirligi (Davletov) bilan birgalikda ikki oy muddatda filiallar va nodavlat oliy ta’lim tashkilotlariga davlat buyurtmasi parametrlarini shakllantirish tartibini tasdiqlasin.

2. 2021/2022 o‘quv yili uchun davlat buyurtmasi parametrlari:

a) bakalavrlar tayyorlash bo‘yicha:

kunduzgi ta’lim shakliga – 113 530 nafar etib 1-ilovaga muvofiq;

sirtqi ta’lim shakliga – 37 675 nafar etib 1a-ilovaga muvofiq;

kechki ta’lim shakliga – 6 550 nafar etib 1b-ilovaga muvofiq;

b) magistrlar tayyorlash bo‘yicha – 12 900 nafar etib 2-ilovaga muvofiq;

v) filiallar va nodavlat oliy ta’lim tashkilotlarida davlat granti asosida kadrlar tayyorlash bo‘yicha – 500 nafar etib 3-ilovaga muvofiq tasdiqlansin.

3. Belgilansinki, 2021/2022 o‘quv yili qabulida:

abituriyentlarni ro‘yxatdan o‘tkazish joriy yilning 22 iyunidan 22 iyuliga qadar (22 iyul kuni ham) bo‘lgan muddatda Yagona interaktiv davlat xizmatlari portali hamda Davlat test markazining rasmiy veb-sayti orqali amalga oshiriladi;

Mahalla va oilani qo‘llab quvvatlash vazirligining tavsiyanomasiga ega bo‘lgan xotin-qizlar uchun bakalavriatning kunduzgi ta’lim shakli bo‘yicha umumiy belgilangan davlat granti asosidagi qabul ko‘rsatkichlariga nisbatan qo‘shimcha 2 000 ta davlat granti asosidagi qabul ko‘rsatkichlari ajratiladi;

Samarqand viloyati Urgut tumanini ijtimoiy-iqtisodiy rivojlantirish hamda ta’lim tizimida kadrlar qo‘nimsizligini kamaytirish maqsadida bakalavriatning kunduzgi ta’lim shaklida pedagogika yo‘nalishlari bo‘yicha umumiy belgilangan davlat granti asosidagi qabul ko‘rsatkichlariga nisbatan mazkur tuman uchun qo‘shimcha 100 ta davlat granti asosidagi maqsadli qabul ko‘rsatkichlari ajratiladi;

abituriyentlarga test sinovi topshiriladigan fanlar majmuasi hamda fanlar ketma-ketligi bir xil bo‘lgan beshtagacha bakalavriat ta’lim yo‘nalishi bo‘yicha tanlovda ishtirok etish huquqi beriladi;

abituriyentlarga ro‘yxatdan o‘tish jarayonida tanlangan bakalavriat ta’lim yo‘nalishlari ustuvorligiga qarab dastlab davlat granti, keyinchalik to‘lov-kontrakt asosida tanlovda ishtirok etish bo‘yicha qo‘shimcha imkoniyat beriladi.

4. 2021/2022 o‘quv yilida O‘zbekiston Respublikasi ta’lim muassasalariga o‘qishga qabul qilish bo‘yicha davlat komissiyasining (keyingi o‘rinlarda – Davlat komissiyasi) tarkibi 4-ilovaga muvofiq tasdiqlansin.

Davlat komissiyasiga quyidagi huquqlar berilsin:

zarurat bo‘lganda, oliy ta’lim muassasalarining moddiy-texnika bazasi, professor-o‘qituvchilari tarkibi va o‘quv-metodik ta’minotidan kelib chiqib, yangi bakalavriat ta’lim yo‘nalishlari va magistratura mutaxassisliklarini kiritish hamda tashkil etiladigan yangi oliy ta’lim muassasalari qabul parametrlarini belgilash uchun davlat buyurtmasi parametrlariga o‘zgartirish va qo‘shimchalar kiritish;

oliy ta’lim muassasalarining bakalavriat va magistraturasiga tegishli tarmoqlar va hududlar bo‘yicha maqsadli qabul parametrlarini belgilash;

oliy ta’lim muassasalariga bakalavriatning masofaviy ta’lim shakliga o‘qishga qabul qilishning davlat buyurtmasi parametrlarini tasdiqlash;

Oliy va o‘rta maxsus ta’lim vazirligi hamda tizimida oliy ta’lim muassasalari bo‘lgan vazirlik va idoralarning takliflari asosida oliy ta’lim muassasalarining (o‘zini o‘zi moliyalashtirish tizimiga o‘tgan oliy ta’lim muassasalari bundan mustasno) bakalavriat ta’lim yo‘nalishlari bo‘yicha bazaviy to‘lov-kontrakt qiymatidan kelib chiqib, tabaqalashtirilgan to‘lov-kontrakt minimal miqdorining yagona ko‘rsatkichlarini belgilash;

professional ta’lim muassasalariga o‘qishga qabul qilishning davlat buyurtmasi parametrlarini tasdiqlash.

5. Xalq ta’limi vazirligi (Shermatov) Samarqand viloyati hokimligi (Turdimov), Iqtisodiy taraqqiyot va kambag‘allikni qisqartirish vazirligi (Norkulov) hamda Oliy va o‘rta maxsus ta’lim vazirligi (Toshkulov) bilan birgalikda bir hafta muddatda Samarqand viloyati Urgut tumani uchun pedagogika yo‘nalishlari bo‘yicha ajratilgan qabul parametrlarini oliy ta’lim muassasalari kesimida taqsimlash bo‘yicha asoslangan takliflarni Davlat komissiyasiga kiritsin.

6. Belgilansinki:

a) 2021/2022 o‘quv yili qabulida:

davlat oliy ta’lim muassasalarining magistratura (klinik ordinatura) mutaxassisliklariga o‘qishga qabul qilish ikki bosqichda amalga oshiriladi. Bunda, birinchi bosqichda davlat oliy ta’lim muassasasi tomonidan tanlangan mutaxassislikka mos fanlar bo‘yicha kirish imtihonlari, ikkinchi bosqichda Davlat test markazi tomonidan chet tili bo‘yicha test sinovlari o‘tkaziladi;

magistratura (klinik ordinatura)ga o‘qishga qabul qilishda chet tili bo‘yicha tegishli darajadagi milliy yoki xalqaro sertifikatga ega abituriyentlar ikkinchi bosqichda chet tilidan test sinovini topshirishdan ozod qilinadi va ularga mazkur fan bo‘yicha maksimal ball beriladi;

magistratura (klinik ordinatura) mutaxassisligiga mos fanlar bo‘yicha imtihonlar natijalari imtihon o‘tkazilganidan keyin uch kun muddatda davlat oliy ta’lim muassasasi tomonidan idoralararo elektron axborot almashinuv tizimi orqali Davlat test markaziga taqdim etiladi hamda mazkur muassasaning rasmiy veb-saytida e’lon qilinadi;

abituriyentning chet tili bo‘yicha test sinovidan to‘plagan ballari to‘g‘risida ma’lumot test sinovlari o‘tkazilgan kunning ertasiga hamda magistratura (klinik ordinatura) qabuli bo‘yicha tanlov natijalari test sinovlari to‘liq yakunlangandan so‘ng bir hafta muddatda Davlat test markazining rasmiy veb-saytida e’lon qilinadi;

b) 2021/2022 o‘quv yili qabulidan boshlab:

abituriyentdan alohida iqtidor talab etiladigan bakalavriat ta’lim yo‘nalishlariga o‘qishga qabul qilishda kasbiy (ijodiy) imtihonlardan so‘ng majburiy uchta – ona tili (o‘zbek, rus yoki qoraqalpoq tili), matematika va O‘zbekiston tarixi fanlari bo‘yicha Davlat test markazi tomonidan test sinovlari o‘tkaziladi;

qonunchilik hujjatlariga muvofiq oliy ta’lim muassasalariga imtihonlarsiz davlat granti asosida o‘qishga kirish bo‘yicha imtiyozga ega bo‘lgan shaxslar umumiy qabul parametrlaridan tashqari qo‘shimcha davlat granti asosida o‘qishga qabul qilinadi;

xorijiy fuqarolarni davlat oliy ta’lim muassasalariga o‘qishga qabul qilish belgilangan tartibda o‘tkaziladigan suhbat natijalariga ko‘ra oliy ta’lim muassasasi rektorining buyrug‘i asosida amalga oshiriladi;

magistratura (klinik ordinatura) mutaxassisliklariga qo‘shimcha qabul parametrlari asosida o‘qishga qabul qilingan abituriyentlarning to‘lov-kontrakt summasi bir talabaga to‘g‘ri keladigan real xarajatlardan kelib chiqib, oliy ta’lim muassasasi tomonidan mustaqil belgilanadi;

v) 2022/2023 o‘quv yili qabulidan boshlab ro‘yxati mazkur qarorga 5-ilovada keltirilgan oliy ta’lim tashkilotlariga qabul parametrlari xorijiy mamlakatdagi bosh oliy ta’lim tashkiloti, Iqtisodiy taraqqiyot va kambag‘allikni qisqartirish vazirligi, Moliya vazirligi, Oliy va o‘rta maxsus ta’lim vazirligi hamda Ta’lim sifatini nazorat qilish davlat inspeksiyasi bilan kelishgan holda mazkur oliy ta’lim tashkilotlari Vasiylik kengashi qarori bilan tasdiqlanadi.

7. 2021 yil 15 iyuldan boshlab talabalar o‘qishini ko‘chirishning quyidagi tartibi joriy qilinsin, unga muvofiq:

a) talabalar o‘qishini xorijiy mamlakatlarda faoliyat yuritayotgan (shu jumladan, xalqaro reytinglarda birinchi 1 000 ta o‘rindan birini egallagan) oliy ta’lim tashkilotlaridan O‘zbekiston Respublikasi davlat oliy ta’lim muassasalarining mos va turdosh ta’lim yo‘nalishlariga ko‘chirishda:

talabadan alohida iqtidor talab etiladigan ta’lim yo‘nalishlari bo‘yicha kasbiy (ijodiy) imtihonlar, boshqa ta’lim yo‘nalishlari bo‘yicha test sinovlari o‘tkaziladi. Bunda, kasbiy (ijodiy) imtihonlar tegishli oliy ta’lim muassasasi tomonidan, test sinovlari Davlat test markazi tomonidan o‘tkaziladi;

test sinovlari va kasbiy (ijodiy) imtihonlar bo‘yicha o‘tish ballari joriy yil 25 iyulga qadar, keyinchalik har yili 15 iyulga qadar Oliy va o‘rta maxsus ta’lim vazirligi hamda tizimida oliy ta’lim muassasalari bo‘lgan vazirlik va idoralar tomonidan belgilanadi hamda ommaviy axborot vositalarida e’lon qilinadi;

o‘tish balidan past ball to‘plagan talabalar bakalavriatga qabul qilishdagi tartibga muvofiq tabaqalashtirilgan to‘lov-kontrakt asosida o‘qishga qabul qilinadi;

test sinovlari va kasbiy (ijodiy) imtihonlar natijalari Davlat test markazi hamda oliy ta’lim muassasalarining rasmiy veb-saytlarida e’lon qilinadi;

b) talabalar o‘qishini xorijiy mamlakatlarda faoliyat yuritayotgan oliy ta’lim tashkilotlaridan O‘zbekiston Respublikasi davlat oliy ta’lim muassasalarining mos va turdosh bo‘lmagan ta’lim yo‘nalishlariga ko‘chirishga ruxsat etilmaydi;

v) talabalar o‘qishini O‘zbekiston Respublikasining bir hududida joylashgan davlat oliy ta’lim muassasasidan boshqa hududidagi davlat oliy ta’lim muassasasiga ko‘chirishda:

o‘qishni mos va turdosh ta’lim yo‘nalishlariga ko‘chirishga uzrli sabablar mavjud bo‘lganda ruxsat etiladi. Bunda, o‘qishni ko‘chirish so‘ralayotgan hududda mos va turdosh ta’lim yo‘nalishi mavjud bo‘lmaganda, o‘qishni mazkur hududdagi oliy ta’lim muassasasining boshqa ta’lim yo‘nalishiga ko‘chirishga ruxsat etiladi;

talabaning respublika bir hududidan ikkinchi hududiga doimiy yashash uchun ko‘chib o‘tishi, turmush o‘rtog‘i yoki ota-onasining mehnat faoliyatini amalga oshirish joyi boshqa hududga o‘zgartirilishi, nikoh tuzgandan keyin turmush o‘rtog‘i doimiy yashaydigan hududga ko‘chib o‘tishi uzrli sabablar etib tan olinadi;

talabalarning o‘qishini uzrli sabablar mavjud bo‘lmagan holatlarda, shuningdek, mos va turdosh bo‘lmagan ta’lim yo‘nalishlariga ko‘chirish o‘rnatilgan tartibda, tegishli bakalavriat ta’lim yo‘nalishi uchun belgilangan tabaqalashtirilgan to‘lov-kontraktning minimal miqdoriga teng bo‘lgan bir martalik to‘lov asosida amalga oshiriladi (mazkur kichik bandning ikkinchi xatboshisida ko‘rsatilgan holatlar bundan mustasno);

g) talabalar o‘qishini O‘zbekiston Respublikasida faoliyat yuritayotgan filiallar va nodavlat oliy ta’lim tashkilotlaridan:

O‘zbekiston Respublikasi davlat oliy ta’lim muassasalarining mos va turdosh ta’lim yo‘nalishlariga ko‘chirish mazkur bandning “a” kichik bandida nazarda tutilgan tartibda;

O‘zbekiston Respublikasi davlat oliy ta’lim muassasalarining mos va turdosh bo‘lmagan ta’lim yo‘nalishlariga ko‘chirish o‘rnatilgan tartibda, tegishli bakalavriat ta’lim yo‘nalishi uchun belgilangan tabaqalashtirilgan to‘lov-kontraktning minimal miqdoriga teng bo‘lgan bir martalik to‘lov asosida amalga oshiriladi;

d) sport musobaqalari g‘olibi sifatida imtiyoz bilan oliy ta’lim muassasalariga davlat granti asosida o‘qishga qabul qilingan hamda kunduzgi ta’lim shaklida tahsil olayotgan talabalarning o‘qishini ularning arizalariga muvofiq, sirtqi ta’lim shaklidagi mos va turdosh ta’lim yo‘nalishiga (sirtqi ta’lim shakli mavjud bo‘lgan taqdirda) davlat granti asosida ko‘chirishga ruxsat beriladi.

8. Ta’lim sifatini nazorat qilish davlat inspeksiyasi (Tashkenbayev) Tashqi ishlar vazirligi (Arziyev) bilan birgalikda 2021 yil 15 iyulga qadar qo‘shni davlatlarda faoliyat yuritayotgan va vakolatli tashkilot tomonidan akkreditatsiyadan o‘tgan oliy ta’lim tashkilotlari ro‘yxatini rasmiy veb-saytida e’lon qilsin hamda mazkur ro‘yxatning har yili yangilab borilishini ta’minlasin.

9. O‘zbekiston Respublikasi Prezidentining 2020 yil 12 noyabrdagi “Birlamchi tibbiy-sanitariya yordami muassasalari faoliyatiga mutlaqo yangi mexanizmlarni joriy qilish va sog‘liqni saqlash tizimida olib borilayotgan islohotlar samaradorligini yanada oshirish chora-tadbirlari to‘g‘risida”gi PF–6110-son Farmonida 2021/2022 o‘quv yilidan boshlab Guliston davlat universiteti, Qarshi davlat universiteti, Jizzax davlat pedagogika instituti va Navoiy davlat pedagogika institutida tibbiyot fakultetlarini tashkil qilish belgilanganligi ma’lumot uchun qabul qilinsin.

Sog‘liqni saqlash vazirligi (Xadjibayev), Turizm va sport vazirligi (Abduxakimov), Oliy va o‘rta maxsus ta’lim vazirligining (Toshkulov) O‘zbekiston davlat jismoniy tarbiya va sport universitetida tibbiyot fakultetini tashkil etish hamda 2021/2022 o‘quv yilidan boshlab sog‘liqni saqlash sohasi uchun oliy ma’lumotli kadrlar tayyorlashni yo‘lga qo‘yish to‘g‘risidagi taklifiga rozilik berilsin.

Toshkent tibbiyot akademiyasi mazkur bandda ko‘rsatilgan ta’lim muassasalariga tibbiyot fakultetlari faoliyatini samarali tashkil etish, ularni o‘quv-metodik jihatdan ta’minlash va malakali professor-o‘qituvchilar bilan to‘ldirishda ko‘maklashsin.

10. Shunday tartib o‘rnatilsinki, unga muvofiq, 2021/2022 o‘quv yilidan boshlab, Olimpiya va Paralimpiya, Osiyo va Paraosiyo o‘yinlari va jahon chempionatlarida oxirgi uch yilda g‘olib va sovrindor (1–3-o‘rin) bo‘lgan sportchi-o‘quvchilar davlat oliy ta’lim muassasalarining bakalavriat ta’lim yo‘nalishlariga kunduzgi, sirtqi va kechki ta’lim shakllariga qo‘shimcha davlat granti asosida kirish imtihonlarisiz qabul qilinadi.

Bunda, Olimpiya va Paralimpiya, Osiyo va Paraosiyo o‘yinlari va jahon chempionatlarida g‘olib va sovrindor (1–3-o‘rin) bo‘lgan sportchi-o‘quvchilar qabul qilinadigan bakalavriat ta’lim yo‘nalishlari ro‘yxati Turizm va sport vazirligi, Oliy va o‘rta maxsus ta’lim vazirligi hamda tizimida oliy ta’lim muassasalari bo‘lgan vazirlik va idoralarning asoslantirilgan takliflariga muvofiq Davlat komissiyasi tomonidan tasdiqlanadi hamda Turizm va sport vazirligining rasmiy veb-saytida e’lon qilinadi.

11. Ta’lim sifatini nazorat qilish davlat inspeksiyasi (Tashkenbayev) Oliy va o‘rta maxsus ta’lim vazirligi (Toshkulov) hamda tizimida oliy ta’lim muassasalari bo‘lgan vazirlik va idoralar bilan birgalikda 2021 yil 1 noyabrga qadar davlat oliy ta’lim muassasalarida yangi bakalavriat ta’lim yo‘nalishlari va magistratura mutaxassisliklari bo‘yicha ta’lim faoliyatini amalga oshirish uchun ularning moddiy-texnika bazasi, professor-o‘qituvchilari va o‘quv-metodik ta’minotiga qo‘yiladigan minimal talablarni (keyingi o‘rinlarda – minimal talablar) ishlab chiqsin va tasdiqlasin.

Belgilansinki, 2022/2023 o‘quv yili qabulidan boshlab, davlat oliy ta’lim muassasalariga, ular minimal talablarga javob bergan taqdirda, yangi bakalavriat ta’lim yo‘nalishlari va magistratura mutaxassisliklari bo‘yicha ta’lim faoliyatini amalga oshirishga ruxsat etiladi.

12. Davlat komissiyasi besh kun muddatda 2021/2022 o‘quv yili uchun:

Sog‘liqni saqlash vazirligi, Xalq ta’limi vazirligi, Veterinariya va chorvachilikni rivojlantirish davlat qo‘mitasi, Tibbiy-ijtimoiy xizmatlarni rivojlantirish agentligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari buyurtmalariga binoan sog‘liqni saqlash, xalq ta’limi, veterinariya, tibbiy-ijtimoiy xizmatlar sohalarida oliy ma’lumotli kadrlarga ehtiyoj yuqori bo‘lgan hududlar uchun davlat buyurtmasi parametrlarining davlat granti asosidagi qabul ko‘rsatkichlari doirasida maqsadli qabul parametrlarining tuman (shahar)lar kesimidagi taqsimotini;

Oliy va o‘rta maxsus ta’lim vazirligi, tizimida oliy ta’lim muassasalari bo‘lgan vazirlik va idoralarning takliflari asosida davlat buyurtmasi parametrlarini ta’lim tillariga qarab taqsimotini;

Iqtisodiy taraqqiyot va kambag‘allikni qisqartirish vazirligi, Oliy va o‘rta maxsus ta’lim vazirligi hamda Ta’lim sifatini nazorat qilish davlat inspeksiyasi takliflari asosida filiallar va nodavlat oliy ta’lim tashkilotlariga davlat buyurtmasi parametrlarining kadrlar buyurtmachilari hamda ta’lim yo‘nalishlari kesimidagi taqsimotini tasdiqlasin.

13. Oliy va o‘rta maxsus ta’lim vazirligi (Toshkulov) bir oy muddatda:

O‘zbekiston texnik jihatdan tartibga solish agentligi, Iqtisodiy taraqqiyot va kambag‘allikni qisqartirish vazirligi, Bandlik va mehnat munosabatlari vazirligi bilan birgalikda 2021/2022 o‘quv yilida yangi kiritilayotgan bakalavriat ta’lim yo‘nalishlari hamda magistratura mutaxassisliklari bo‘yicha Oliy ta’lim yo‘nalishlari va mutaxassisliklari klassifikatoriga belgilangan tartibda o‘zgartirish va qo‘shimchalar kiritsin;

davlat oliy ta’lim muassasalari tomonidan yangi kiritilayotgan bakalavriat ta’lim yo‘nalishlari va magistratura mutaxassisliklarining malaka talablari, o‘quv rejalari hamda fan dasturlarining ishlab chiqilishini va belgilangan tartibda tasdiqlanishini ta’minlasin.

14. O‘zini o‘zi moliyalashtirish tizimiga o‘tgan oliy ta’lim muassasalari 2021/2022 o‘quv yili uchun bakalavriat ta’lim yo‘nalishlari va magistratura mutaxassisliklari bo‘yicha belgilangan to‘lov-kontrakt miqdori haqidagi ma’lumotlarni 2021 yil 1 iyulga qadar ommaviy axborot vositalarida e’lon qilsinlar.

15. Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari pandemiya sharoitida abituriyentlardan hujjatlarni qabul qilish va test sinovlarini o‘tkazish jarayonlarini karantin va xavfsizlik talablariga to‘liq amal qilgan holda yuqori saviyada tashkil etishga shaxsan mas’ul etib belgilansin.

16. Belgilab qo‘yilsinki, 2021/2022 o‘quv yilida oliy ta’lim muassasalariga davlat granti asosida bakalavriat va magistraturaga o‘qishga qabul qilingan shaxslarni o‘qitish bilan bog‘liq xarajatlar Davlat byudjeti mablag‘lari hisobidan moliyalashtiriladi.

Moliya vazirligi kadrlar buyurtmachilari tomonidan taqdim etilgan asoslangan hisob-kitoblarga ko‘ra filiallar va nodavlat oliy ta’lim tashkilotlariga davlat buyurtmasi parametrlari asosida o‘qishga qabul qilingan fuqarolarning o‘qitish xarajatlari bosqichma-bosqich qoplab borilishini ta’minlasin.

17. Davlat test markaziga (Karimov) markaz faoliyatini rivojlantirish jamg‘armasi mablag‘lari hisobidan qo‘shimcha shtat birliklarini joriy etish huquqi berilsin.

18. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari ikki oy muddatda respublikaning barcha hududlarida Davlat test markaziga tegishli namunaviy tipdagi pavilonlarning qurilishi uchun belgilangan tartibda yer uchastkalari ajratilishi hamda 2022 yil 1 iyunga qadar mazkur pavilonlar qurib bitkazilishi va foydalanishga topshirilishini ta’minlasin.

19. Belgilansinki, mazkur qarorning 6 va 7-bandlari bilan joriy etilayotgan tartib O‘zbekiston Respublikasi Prezidenti huzuridagi Davlat boshqaruvi akademiyasiga, O‘zbekiston Respublikasi Bosh prokuraturasi Akademiyasiga, O‘zbekiston Respublikasi Bank-moliya akademiyasiga va harbiy oliy ta’lim muassasalariga tatbiq etilmaydi.

20. Oliy va o‘rta maxsus ta’lim vazirligi (Toshkulov):

a) ikki hafta muddatda:

2021/2022 o‘quv yilidan boshlab masofaviy ta’lim tashkil etiladigan davlat oliy ta’lim muassasalari ro‘yxati hamda tegishli ta’lim yo‘nalishlari uchun qabul parametrlari bo‘yicha takliflarni Davlat komissiyasiga kiritsin;

Ta’lim sifatini nazorat qilish davlat inspeksiyasi (Tashkenbayev) bilan birgalikda magistratura mutaxassisliklari va ularga muvofiq bakalavriat ta’lim yo‘nalishlari ro‘yxatini qayta ko‘rib chiqsin, yangilangan ro‘yxatni tasdiqlasin hamda ommaviy axborot vositalarida e’lon qilsin;

b) uch oy muddatda:

2022/2023 o‘quv yili qabulidan boshlab talabalarni magistratura (klinik ordinatura)ga o‘qishga qabul qilishning yangi tartibini joriy etish to‘g‘risidagi;

manfaatdor vazirlik va idoralar bilan birgalikda qonunchilik hujjatlariga mazkur qarordan kelib chiqadigan o‘zgartirish va qo‘shimchalar to‘g‘risidagi takliflarni Vazirlar Mahkamasiga kiritsin.

21. Vazirlar Mahkamasi ikki oy muddatda:

iqtisodiyot tarmoqlarida kamida besh yil ish stajiga ega bo‘lgan fuqarolarni davlat oliy ta’lim muassasalarining sirtqi va kechki ta’lim shakliga suhbat natijalariga ko‘ra tabaqalashtirilgan to‘lov-kontrakt asosida o‘qishga qabul qilish tartibini;

masofaviy ta’limni tashkil etish va boshqarish tartibini;

oliy ta’lim muassasalari va ilmiy tashkilotlarda doktoranturaga qabul qilish tartibini takomillashtirish bo‘yicha qo‘shimcha chora-tadbirlarni belgilovchi Hukumat qarorlarini qabul qilsin.

22. O‘zbekiston Respublikasi Prezidentining ayrim hujjatlariga 6-ilovaga muvofiq o‘zgartirish va qo‘shimchalar kiritilsin.

23. Mazkur qarorning ijrosini samarali tashkil etishga mas’ul va shaxsan javobgar etib oliy va o‘rta maxsus ta’lim vaziri A.X.Toshqulov hamda Davlat test markazi direktori M.M.Karimov belgilansin.

Qaror ijrosi uchun mas’ul idoralar faoliyatini muvofiqlashtirish va nazorat qilish O‘zbekiston Respublikasi Bosh vazirining o‘rinbosari B.A.Musayev va O‘zbekiston Respublikasi Prezidentining maslahatchisi A.A.Abduvaxitov zimmasiga yuklansin.

O‘zbekiston Respublikasi Prezidenti                                                              SH.MIRZIYOYEV

Toshkent shahri,

2021 yil 22 iyun