Andijon davlat universitetining 5-sonli talabalar turar joyida joylashgan to‘garak xonasida “Mohir qo‘llar” to‘garagi faoliyat olib bormoqda. Mazkur to‘garak Prezidentimiz tomonidan ilgari surilgan “Beshta muhim tashabbus” doirasida tashkil etilgan bo‘lib, uning asosiy maqsadi talaba-qizlarni oilaviy hayotga tayyorlash, ularda milliy qadriyatlarga hurmat tuyg‘usini mustahkamlash hamda turli amaliy ko‘nikmalarni shakllantirishdan iborat.

To‘garak mashg‘ulotlari davomida talaba-qizlarga tikish-bichishning zamonaviy va an’anaviy usullari, milliy uslubda yoqa tayyorlash, tikuv mashinasidan to‘g‘ri foydalanish, turli kiyimlarga bezak tikish, shuningdek, tugma qadash kabi kundalik maishiy faoliyatga oid zarur bilim va amaliy ko‘nikmalar muntazam o‘rgatilmoqda.

To‘garak rahbari Dilfuzaxon Xodjayevaning tashabbusi bilan tashkil etilayotgan mashg‘ulotlarda talaba-qizlar nafaqat tikish-bichish bo‘yicha amaliy ko‘nikmalarni, balki uy-ro‘zg‘or ishlarida zarur bo‘lgan boshqa foydali mahoratlarni ham egallab borishmoqda. Ushbu jarayon orqali ularning birdamlik, ijodkorlik va mehnatsevarlik kabi ijobiy fazilatlari yanada mustahkamlanmoqda.